美國蘋果公司不久前才推出iPad，事實上其行政總裁喬布斯（SteveJobs）已成為很多人心目中的神，每當他穿上黑T牛仔褲出來介紹蘋果的新產品，之後就更多人自願加入「蘋果教」，Apps更是「教友」間必談的話題。
最近在電視廣告中不時聽到「Apps」，英文全寫是Applications，即應用程式的意思。iPhone之所以萬人膜拜，全賴背後一群編撰各式各樣應用程式的人，令iPhone的多功能發揮得更淋漓盡致。藝人創意無限，日前更設計了各種潮爆的iPhoneApps。
撰文：李珮洳、王連連
Q1：為何選用iPhone？最愛iPhone甚麼功能？喜歡用甚麼App（s）？
Q2：會不會支持新推出的iPad？
Q3：最想iPhone加入甚麼App？可否畫出來？
《周秀娜》
使用時間：3個月
機殼特色：刻有自己樣貌
其他蘋果產品：iPod/MacBook
A1：我鍾意iPhone最主要係上網方便，同埋好多影相嘅Apps，好好玩。
A2：遲啲出iPad我會買，因為個款好型！
A3：我希望有個App畀我訂隱形眼鏡，我成日都唔記得去買，收工要周圍搵，如果一篤就會將啱我度數嘅Con送嚟畀我，真係慳番唔少時間。
《鄭中基》
使用時間：3年
機殼特色：黑色磨砂
其他蘋果產品：MacBook
A1：我通常用iPhone睇片、聽收音機，有個App可以聽到世界各地歌手新歌，玩遊戲我最鍾意玩PaperToss。
A2：本身我有MacBook，iPhone可以sync埋我啲資料，好方便，我應該會買iPad，因為慣用佢哋嘅產品。
A3：如果加個App變鬚刨就好，有時起身趕住出門口，唔記得剃鬚，我又唔想用人哋嘅鬚刨，若電話都變鬚刨，你話係幾偉大嘅發明呢！
《梁詠琪》
使用時間：3年
機殼特色：粉紅色磨砂
其他蘋果產品：iPod/iMac
A1：貪佢上網方便，我家出trip都好少帶電腦，因為有iPhone已足夠。
A2：iPad我一定買，可以上網、睇書、睇戲、睇報紙，嚿電又有10小時，真係好正。
A3：我好希望有個App係可以揀唔同嘅香水，之後個iPhone就會有香味，咁就好似搽咗香水一樣，成日聞到唔
《方力申》
使用時間：半年
機殼特色：閃銀菱形圖案
其他蘋果產品：MacBook
A1：我平時最常用嘅App係WhatsApp，可以send相同SMS唔使錢，佢唔會有網絡商限制，抵好多。
A2：其實我幾鍾意用蘋果嘅產品，佢推出iPad我一早就訂咗，好期待。
A3：如果佢有個App可以現場睇波就好喇，因為我好鍾意睇足球比賽，咁我出街做嘢都有得睇。
《DJDonald》
使用時間：兩年
機殼特色：連充電器
其他蘋果產品：iMac/MacBook
A1：最常用嘅App係天氣同《蘋果日報》新聞，用嚟睇資訊。同埋影完相仲會用Apps將啲相整到烏喱單刀。
A2：我有好多Apple嘢，所以未急需買iPad住。
A3：公司將會幫我哋整App，我諗會加入埋誅邪App，因為好多人試過俾鬼壓，要鎮妖，一開呢個App就會有銀河道士大笨咒、聖經、心經嚇走污糟嘢。
《Evelyn》
使用時間：1年
機殼特色：酒紅色磨砂
其他蘋果產品：MacBook
A1：我鍾意上Facebook，同埋用電話影相，影相啲Apps仲有好多唔同function同效果。
A2：我有興趣買iPad。
A3：我好鍾意熊貓，有機會設計App我會想24小時都睇到海洋公園同其他國家嘅熊貓，其實之前電視有個熊貓台，如果有個App可以畀我隨時睇到我最鍾意嘅動物咁就好喇。
《關心妍》
使用時間：1年
機殼特色：閃石十字架
其他蘋果產品：iPod
A1：我用佢嚟睇新聞，貪有得睇片，最鍾意玩BlueBlock遊戲消磨時間。
A2：出咗電話我將iPod所有歌放入去，iPad我應該唔買，因為我唔係成日用電腦。
A3：如果有個App係咪高峯就好喇，我哋登台成日要用咪，想去到邊唱都得，又唔使用人哋嘅，衞生好多。
《周麗淇》
使用時間：3年以上
機殼特色：愛原裝機身拒加殼
其他蘋果產品：iPod
A1：我好鍾意啲新科技，iPhone本身多嘢玩，透過一部電話都已經學到好多新嘢。
A2：暫時唔會考慮iPad，因為唔想帶多部機出街。
A3：我會設計一個有得scanbarcodecheck價錢嘅App，有時去shopping想知價錢，唔使吓吓問售貨員，就算之後唔買，都唔使咁尷尬。
《陳貝兒》
使用時間：8日
機殼特色：黑色閃石
其他蘋果產品：iMac
A1：iPhone最好係可以上網，我做緊marketing工作，有得checkemail亦好重要。
A2：我都想買iPad，因為個樣好型。
A3：我會整八達通同信用卡，搭地鐵用電話一嘟就得，至於信用卡去購物拎到成手都係袋，用個電話㩒個掣就畀咗錢，幾方便！
《藍奕邦》
使用時間：兩個月
機殼特色：暫未有心水
其他蘋果產品：iBook
A1：我換iPhone係因為部舊機壞咗，有啲App傳短訊唔使錢，同埋隨時check到email同聽歌。
A2：我唔會買iPad，因為唔support繁體中文。
A3：我想iPhone出一個救命鐘嘅App，如果我不幸俾人打劫，一㩒就可以接去警局，佢哋就追蹤到我嘅位置趕嚟救我，快過打999。
《李彩華》
使用時間：3年
機殼特色：金色啞面
其他蘋果產品：iPod
A1：最常用係Facebook，可以隨時同人溝通聯絡，跟住就係睇天氣同埋股市。
A2：用iPod後幾乎所有嘢都轉晒Apple，所以都可能會買iPad。
A3：如果有App可以幫人分析埋每日化乜嘢妝就好，只要我哋影張相，跟住個電話幫我哋揀眼影、唇膏顏色，咁就唔使諗點化妝，勁過啲化妝師！
