還有甚麼人會為過年穿甚麼而傷腦筋呢？
為春節而添新衣這件事，大概反映了一個並不很富庶的社會，只有平時買不起衣服的人，才要珍惜一年一度的機會大破慳囊吧？你都個個禮拜買新衫咯，只係畀「唔識欣賞」的三姨媽七姑丈睇嘅賀歲裝使乜專登入貨？況且就算買，一年買到尾一日買到黑的你，還有快感嗎？還會有年三十晚臨瞓前望着掛在衣櫃門上那件被膠袋笠住的新絨褸，一邊心想「好嘢呀，聽日就可以着啦」的緊張和期待嗎？
只有365日才放一次的煙花才能挑起你5秒鐘的興奮吧？不，煙花有時一年都放兩次的，不不不，欣澳廸士尼咪日日放囉，今朝忽然想睇都唔使等聽晚。要乜有乜的香港人，真是幸福得來很不幸福，甚至可以說，幸福得來很慘。
還有甚麼人會為過年穿甚麼而傷腦筋，因傷腦筋而快樂呢？
我囉。
‧真係真係真係好鍾意挑戰「拜年裝」這個品味的危險彎角，紅卜卜不是人人着得慣，中國風更是最容易瀨嘢的dresscode。單諗點樣大龍鳳得嚟唔娘兼潮，已是我重陽之後已開始度橋籌備的長壽節目，都相當襟玩o架。
如何將最當時得令的牌子與款式，「化」入最cliche的龍飛鳳舞左青龍右白虎的福祿壽制服中呢？
是不是7月中已造定件Balmain大膊頭的小鳳仙裝並立即送上蘇州搵人刺繡定一幅有骷髗頭的「百鳥朝凰圖」呢？
還是搜購定八條有LVMonogram的絲巾去羅湖城車番件綿衲呢（記得背脊聯番「罵治」四條白線噃）？
又抑或學足Givenchy風格，用黑色leather造旗袍，領口袖口和斜襟的包邊還要打滿鉚釘（兼用啲studs在下擺位砌多幾朵牡丹）呢？
我當然會買定英泥咁大包的Swarovski水晶粒預備黐滿我件內裏夾咗貂鼠毛的「新馬仔式」長衫啦（唔使擔心，我一定記得BlingBling埋下面對功夫鞋嘅）。
‧又或者逆向思考，睇睇CommedesGarcons的歪零歪斜加啲乜可配襯成一套得到利是的新春戰衣。
RickOwens就比較難搞，惟有落重本戴滿一手龍鳳鈪兜心七條金豬頸鏈，都有望拜得吓年。
至於一向有出閃令令東西的Prada、LV、Dior、Lanvin等以豪為主打的品牌，唔使我教你都搵到三幾套喜氣洋洋的CNYOutfits啦。
原來隨口一數，要fashionable得嚟好ChineseNewYear還是有很多很多方法的，只不過很多人連這小小的心思都不肯花吧。
只有極少人會這樣想：如果過年那套衫着嚟過聖誕亦OK着嚟過生日亦無問題着嚟是但一個星期六晚去蒲都得，那麼新正頭和全年其餘的十一個月又有甚麼分別，連帶平安夜、慶生會和其他所謂需要特別打扮的日子都沒有甚麼special了。
係，我真係識過有人年初一穿的那件絲綿衲就是上次萬聖節扮中國女鬼的同一件！
‧沒錯近十年都趁春節出埠旅行的我（不代表避年呀吓），如果留在香港過，都一定不會敷衍了事，比如說十幾年前還在做電台還要參加例行的公司新春團拜時，有次我便特地找TomasChan用國貨公司的織錦料替我縫了件粉紅色有齊各種瑞獸的BikerJacket，真係一係唔玩，否則絕不欺場o架。
‧過年在我們的年代最值得珍惜的是，很多少年人青年人人生裏首次拿着父母親的錢，自主自決地為自己買衫扮靚的機會。
（我的第一次是中一那年，我拿着媽咪畀的兩嚿水去買了套有禮服恤衫企領和胸口百褶的棉質運動衫褲，係呀，Tuxedo+TrackSuit，個idea今日諗番起都仲覺得幾前衞o架，我仲記得那是個叫做「Sparkle」的香港牌子㖭，只可惜元旦日着住那套衫和父母拜年，還被他們勁彈我套新衫肉酸㖭，也難怪佢哋接受唔到嘅，因為套衫係軍綠色嘅，軍綠色的半Tux半運動裝，如今我想起都覺頂唔順。）
‧過年後又是一個少年人品味發育上的重要關口，很多人，例如我，一生人嗰幾件買得起的名牌衫，都是趁儲埋儲埋啲利是錢在過年後的時裝店FinalReduction裏購入的，就算後來還要很多Trial&Error才修練得成我們今日打扮自己的段數，至少那筆新年財是個開始，要不是它我們連錯的機會都沒有，何來從中學習？
‧當然，人說有危才有機，即是有機就有危，亦有很多人因為「新年置裝」這回事而學壞師的，如果一味照抄街坊街里的賀節風格而不懂去蕪存菁，亦很有機會變成……唔，怎樣說呢？你有沒有見過休班的粵劇大老倌穿時裝的樣子？
學名人藝人明星歌手也未必安全，例如到底有沒有人能告訴我，為甚麼這麼多年來每個着長衫唐裝的男藝人，不論他那件賀年裝是桃紅青檸金魚橙還是姣婆藍的，領上一定要加條既唔靚又唔襯甚至唔係幾好意頭的白頸巾呢？
本周通勝
我不知道在命理學上「年初一」撞正「情人節」是否相冲，但在時裝界來講，同時在身上有兩大主題都幾難work。誰要年初一一早便見到穿着低胸LittleBlackDress的女兒來拜年利是？誰又要情人節晚上和一個着住有壽字暗紋的啡色綿衲的儍佬CandleLightDinner？財神和丘比特同場出現，不但不是「喜上加喜」，實行將你兩馬分屍㖭。
但人最緊要往好處看，「年初一」撞正「情人節」並不是最慘的，只要你幻想一下，這個世界上還有人是二月十四號生日的……
這，就是中國人說的「比上不足，比下有餘」了，明未？
Textby黃偉文
本欄逢星期日刊出
mailto:[email protected]
