上星期有報導話香港不少家長學生踴躍參加英國教育展，預備用腳投票，送子女往英國留學（中學），預備讀埋大學，以示對香港新學制三三四投不信任票。
正是人各有志，有錢送子女去英國讀寄宿學校，恭喜晒，但不必因此就話香港教育唔掂。嚴格嚟講，英國好多大學嘅名氣遠遠低於香港嘅大學，又唔係人人入到劍橋、牛津、UCL、LSE與華威等等名牌大學嘅啫。財務A有子長成，在倫敦讀大學，財務A就話：「除咗學好啲英文之外，我覺得阿仔攞個學位，只係讀咗十二張paper，全部係佢自己嗰科嘅（工程），唔使讀選修、副修、通識，我總係覺得差少少，得個專字，其他學科乜都唔識！」咁又睇你鍾意邊一種方法，美國大學有好多選修與核心課程，又要修一科文、一科理、一科戲劇、音樂、藝術、天文之類，仲可以選修英文等語言，課程範圍大好多，美國講廣博，英國講專精，你估廿一世紀僱主鍾意請邊類學生呢？
在馬場碰到公司董事C，C太講起兒女經，佢話：「我哋認為仔女讀大學，本科最好進入liberalartscollege（香港叫做博雅書院），學校夠細，教授學生有溝通，到研究院先至入名牌研究型大學。我哋B仔入咗麻省一間博雅書院，本來讀得好地地，點知佢最近來電郵講，佢上網睇到香港有三間大學名列世界最佳五十大，好鬼叻，問我哋點解要送佢去美國讀書，佢家好想返嚟讀香港名牌大學喎，真俾佢激死！」
公司董事K太太聽到，就話細路在港有菲傭照顧，有父母帶去飲茶、食意大利餐，自己晚上十點半以後就出門去蘭桂坊、SOHO、NOHO，十分迷戀本土文化，唔係好唔鍾意出外留學嘅，想法剛與父母輩相反。
九十後嘅想法可能與八十後嘅想法不同，好多時父母夾硬送佢哋出去讀寄宿學校與大學，隨時離開香港十年八年，如果讀咗醫科，更加以後唔會返嚟，諗落又係唔捨得走嘅。如果有得揀，一切順人意嘅話，最好都係讓子女在本地讀大學，再到外國讀碩士，以至博士，跟住回來香港、大陸工作。賓架W話：「以後工作機會在亞洲，留在歐美無運行！」呀。