倪震前年同美少女張茆搭上，事後以孔雀開屏做譬喻，解釋為何與美少女激吻，八方發現，倪震孔雀開屏呢個本性，極有可能嚟自遺傳，前晚八方就直擊倪匡孔雀開屏實況，十分壯觀！八方直擊
網上遊戲公司Gameone前晚舉行周年晚宴，老闆施仁毅請埋好朋友倪匡夫婦到場，仲有兩個遊戲代言人周秀娜Chrissie同羅凱珊Kama，兩個電車男o靚模女神一齊現身，如此場面都咪話唔震撼，畀毒男見到，當場興奮到暈都似，倪匡見到Chrissie直情開心到見牙唔見眼。
倪匡一見到Chrissie就話：「我識你！」Chrissie紅到上頭條，係人都識佢啦，Chrissie卻唔敢亂講識得倪匡，忽然見到大作家，只係好恭敬咁問好。倪匡又大讚Chrissie「真人靚過上鏡」。倪匡一見到o靚模就滔滔不絕，連倪太都要行埋一邊，好識做咁隨即起身讓座畀Chrissie坐喺倪匡旁邊，等兩人慢慢傾。
見Kama冷淡好多
有美在旁，倪匡講嘢時笑得好似零舍豪邁，仲大讚Chrissie又靚又聰明，指佢早前去科大個講座時表現好好，「嗰日答得真係好，唔識答就話唔識答，個教授真係不知所謂。」倪匡話，既然科大請得Chrissie做嘉賓，就唔應該刁難人哋令人尷尬，咁樣對待細路女，抵鬧啦。獲得大作家稱讚兼力撐，Chrissie喜出望外，一副知遇之恩嘅表情。
後來大會請倪匡同Chrissie合照，本來放咗兩張凳畀兩個人坐，不過倪匡堅持站起來影相，雖然佢揸住枴杖，不過步履穩健，同Chrissie影相時企得好穩陣。倪匡對Chrissie咁熱情，大家唔好以為佢對個個o靚模都咁冧，另一個代言人Kama埋到佢身時，唔知點解倪匡表現冷淡好多，只係客客氣氣咁打個招呼，循例影張相就算，搞到Kama都有啲唔好意思咁樣。
mailto:[email protected]
