挨年近晚，真係有人歡樂有人愁，正當陳振聰喺小甜甜爭產案中敗訴，兼面對隨時俾警方起訴而愁爆之際，大勝一方嘅龔家就剛好相反，連串慶祝活動幾乎搞唔停，聽日又舉行慶祝會。
與龔家份屬世交嘅卓能集團董事趙世曾，前晚到紅館睇孫燕姿演唱會時爆料畀八方，透露聽日會同龔仁心等龔家老友食團年飯，順便慶祝贏官司，「仁心一家人經歷過好長時間，好辛苦，作為朋友當然關心佢哋，總之大家安樂晒。」
龔家喺贏官司當日，已經搞過一場慶功宴，慶完再慶，可想而知佢哋有幾高興，趙世曾又話小甜甜遺產會用作慈善用途，完全符合老朋友嘅遺願。
至於陳振聰敗訴係咪時辰到，趙公子話：「要等法庭去判，對呢個人（陳振聰）唔適宜講咁多。」陳表明會上訴，趙公子稱是意料中事，「否則佢會俾人拉，上訴反而仲會有機會，但作為局外人，都係唔適宜講咁多。」