39歲的傅明憲（GiGi）回復單身後，生活繼續多姿多采。前晚她抱愛犬到中環出席愛護動物協會活動，但之後即飛甩愛犬，偕同立法會前任議員楊孝華的長子楊哲寧及另一男伴，一拖二蒲蘭桂坊搵食，不知其男友莊家彬得悉後會否醋勁大發？
傅明憲前晚以香港愛護動物協會會長身份現身中區警署，舉行88周年慶祝活動，當中陳逸璇更拖其墨西哥籍準未婚夫Marc亮相，而曾因模特兒工作不和的陳沛嘉及陳嘉容則作老友狀合照。
雞啄唔斷
是夜GiGi帶同15歲的北京狗愛犬西蘭花現身，問到她農曆新年有何活動，她說：「未有計劃，都係同屋企四隻老狗過，佢哋嘅年紀，以人計算都過105歲，隻隻都係人瑞。」再問她會否到莊士集團太子爺男友莊家彬的家拜年，她避忌說：「私人嘢唔講，今日係動物協會88周年，都係圍繞呢個主題。」
會上GiGi避談莊家彬，但作為主人家的她則滿場飛，與立法會前任議員楊孝華的長子楊哲寧及任職公關的Benny雞啄唔斷，三人有講有笑。至晚上近10時活動完結，GiGi餘興未了再有下場，相約楊哲寧和Benny搵食，他們由警署步往蘭桂坊時，女方明顯跟楊哲寧較好傾，隨後三人齊進一商業大廈內的食肆晚膳。
稱為醫肚
對於前晚一拖二開餐，GiGi昨接受電話訪問時說：「我請咗啲朋友去酒會，後來班朋友肚餓，部份去咗食嘢，我搞埋啲手尾先同兩個朋友落去join佢哋啫。」她謂現時花很多時間在愛護動物協會的工作上，負責與動物有關的工作，很享受也很開心。不過近年GiGi的確緋聞多多，曾先後與周立璟、丁子高及東華副主席梁定宇等扯上關係，當中與莊家彬的緋聞傳出至今有三年多，在其緋聞列表中算是最長情。
採訪、攝影：朱志聰、黃文偉、羅慧敏