星級髮型師姚永洪（PiusYiu）於英國最著名髮型學府VidalSassoon紅褲子畢業，到了今天，他認為學校教出來的一套oldschool到不得了，不求做一級髮型工匠，反而現因財政壓力全消可隨心freestyle做他喜歡做的事才是快活不過。 撰文：梁錦貞
說起Pius的星級髮型師路，都是一個老套不過的故事，PiusYiu的阿叔是當年「麗花」（Rever）的唯一中國籍髮型師，他每年放暑假都在那裏負責掃頭髮，慢慢因而對剪髮產生興趣，到中三讀書不成，一是回父親的貿易公司幫手，一是阿叔供他往英國VidalSassoon讀剪髮基本功及髮型設計，他當然選了後者。
曾被數字壓垮
PiusYiu說：「當時去VidalSassoon讀個半年course貴過讀一年大學，為咗要還番畀阿叔，我返香港之後幫足佢七年打工，然後就轉咗去Headquarters，跟住自己創業開Orient4，不過97至05年呢段時間認真曲折辛苦，一個人揹起四層樓三間salon，日日俾數字生意塞死晒，創作力自然會低咗，後來又擺好多時間去咗台灣同上海，直至舊年先算真正回歸番香港，家呢間O4我當係workshop多過做生意，台灣同香港其他salons嘅生意又好穩定，冇咗啲塞實個腦嘅生意同壓力，鬆晒之後諗嘢仲free，我都知做咁多年梗會行慢咗同『滑牙』，但係好開心竟然冇乜出現呢種情形。」
Pius續說：「有一樣想講嘅係我將以前好難得喺VidalSassoon學嗰套一早畀番先生啦，到家仲跟住學校嗰套先至係oldschool，睇番佢哋家仲係講緊幾何髮型我都頂唔順，所以睇怕我都做唔到一級工匠，我會傾向隨心freestyle多一啲，不過創作呢樣嘢好多時係隨住技術演變，好似我呢排鍾意玩駁髮，呢樣嘢並唔係乜嘢咁新，初初用纖維，跟住用真髮用膠水黐，家就用真髮加埋珠仔，每樣嘢都係兜個圈就有唔同嘅玩法。」
不可一面獨大
星級顧客名單中包括周迅、孫燕姿、周杰倫、古天樂及蔡卓妍（阿Sa）等，Pius表示與藝人合作，目的都是把他們固有的框框再推前一步，真正更刺激的實驗都會搞hairshow才做，他說：「因為同藝人合作，仲有成team人好似化妝、形象、攝影，唔可以某一part獨大，玩大咗佢嘅公司同fans未必鍾意同接受，所以推前一步已經好夠，有時明知個客搵你係想做嘅好悶嘅靚女job，明知個party唔好玩，咪唔去囉。」
剪衫砌鋪玩斷袖
除了拿手剪出創出一個髮型外，Pius的鉸剪還另有用途，就是愛DIY剪爛舊衫變新衫，幾乎一年到晚都是黑白monotonelayeredlook的他說：「人人以為我冇換衫，其實我不知幾講究幾挑剔先出街，我特別鍾意儲長身白恤衫，去到邊搵到邊。」訪問當日他身穿的短袖藍絨褸，就是一件剪短了袖的日本校褸，另外，80年代大熱的RomeoGigli也被他狠狠斷袖而有了新生命。
心血salon
衣衫以外，他也愛以不同物料創造headpiece，通常都是所花無幾，例如用羽毛球做成的，在H&M賣29元一包的膠鈪砌成的headpiece。另外，其salon與別不同的homeymood也由他一手打造，破舊衣櫃，梳化及皮篋等都是他從上海，嚤囉街等買回來的珍品，還有擺滿酒的happyhourarea，好讓顧客也可以hea一點，全間salon除了專業水電關卡外，其他每一部份都是他的心血，所以他笑說：「啲賊要爆格爆我好啦，唔好爆我間salon呀！」
