過埋農曆年,公開試準考生又差唔多進入最後備戰狀態,今年十幾萬中學會考末代考生好大機會有禮物收,事關考試及評核局打算向考生送啲小紀念品,等佢哋可以為呢個即將成為歷史嘅公開考試留點回憶。禮物要有紀念價值,又唔能夠太花費,考評局歡迎大家提意見,有人建議同郵政署合作出郵票,可以集紀念與炒賣價值於一身,佢哋認為可以諗,但未有最後定案。
其實,送紀念品所花無幾,幫考評局做宣傳計落條數都有賺。除咗送嘢,考評局度緊搵第一代會考生現身說法,倒後鏡話當年,又考慮展覽歷代會考證書。原來早年會考證書個考生中文名由專人用毛筆書寫,較家用電腦列印有人味得多。