獲封「好打得」嘅發展局局長林鄭月娥究竟有幾打得呢？大家今日可以試吓。唔係動粗，只係可以打電話去電台，事關林鄭忽然玩做DJ，今日起一連四個周末早上10點喺商業電台開咪一小時，聽市民對舊區重建意見。
林鄭開咪由賣豪宅賺到顛嘅市建局埋單，據講是但求其喺大氣電波發噏風就要使10幾萬元，浪費公帑絕不手軟。呢條捧局長做名嘴嘅絕世好橋，係由公關公司建議，因為電台收聽率高，局長講嘢多人聽咁話。
另一個冇咁打得，要鬼祟搭地鐵避開群眾嘅運輸及房屋局局長鄭汝樺，繼續遠離市民，今日喺政府總部舉行網上論壇，聽吓80後對政府諮詢機制有乜意見，嘉賓人選冇驚喜，市民想畀意見，今早9點起可到政府網站，亦可以睇吓鄭汝樺facebook，佢會新開一個fb戶口同80後溝通，不過有賞味期限，只限今早9點至12點。
鄭汝樺fb應酬三個鐘
反高鐵人士批評高官寧願匿埋搞網上論壇，都唔肯出席明天舉行嘅反思高鐵論壇，運輸局就話高鐵已通過撥款，冇基礎繼續討論高鐵問題，所以明天個論壇局長唔奉陪。八方聽落，覺得有人過咗海就神仙囉，既然攞咗幾百億元，仲講咁多做乜？
正如街頭寶藥黨，錢財到手，高飛遠走，難怪鄭汝樺個fb戶口都只係開三個鐘頭，八方唔敢話佢冇誠意，不過就真係覺得好奇怪，聽埋民政局德成局長噚日解釋，終於有啲頭緒。德成局長噚日喺立法會被議員問到，會唔會都開個fb戶口玩玩，同80後多接觸、溝通，局長好滑頭咁話，平日同議員見面交流時間都唔夠，開個fb戶口真係要慎重考慮先可決定，暗示自己冇咁多時間玩社交網站，原來高官時間唔夠使，難怪鄭汝樺都只係開放3小時應酬吓網民就收工。
80後批評政府唔聽佢哋聲音，德成局長否認，又話「唔係所有成年人都係奸嘅，可以係忠嘅。」呢點八方知道，德成局長對於偉大嘅黨，豈會唔忠心？
mailto:[email protected]