爭產官司告一段落，龔家名正言順坐正做華懋話事人，打鐵趁熱話咁快就有新搞作，噚日宣佈今個月12號起，喺荃灣如心廣場舉行「荃城賀壽迎新歲」活動，希望吸引數十萬人流帶旺個場。
華懋向來少做宣傳，爭產官司期間除咗有限度賣樓甚少大動作，呢次趁農曆年落力搞商場活動，象徵新年新開始意味甚濃。如心廣場賀年活動唔玩風水玄學、占卜問運程呢啲迷信嘢，以「愛」及「壽」為主題，在商場擺放巨型許願桃花，向市民免費派發願望卡，畀市民、情人喺桃花下許願。
華懋新聞稿冇話願望卡內容有限制，即係大家可以寫「老公豬」、「老公公」或「OnelifeOnelove」。正月初七人日，如心廣場會請10,000名市民共同拼貼出巨型「壽」字，寓意萬人賀壽，福壽無疆。