【上月盟主】今個月〈開倉版〉嘅頭條由我青蛙仔主理，近排我喺呢個欄嘅走勢幾好，希望今次可以帶挈球迷執番少少辦年貨。我揀喺今季超正氣嘅利華古遜，博佢哋喺牛年尾繼續做財神，派錢畀粉絲。
我愛隊拜仁慕尼黑近來幫球迷贏唔少，但季初佢哋係衰波之霸，累捧場客輸到甩褲，家陣叫做打番個和。但利華古遜就唔同，由開「咧」至今都好穩定，仲做埋冬季「1哥」。歇完冬後佢哋依然強勢，連贏緬恩斯、賀芬咸同埋弗賴堡，而且連盤都贏埋。經過20輪聯賽後，佢哋繼續以12勝8和排第1，仲入咗成45球，認真犀利。
利軍雙煞共入23球
季初我都擔心佢哋有射手希美斯長唞，數糊能力會受損，不過好在傑斯寧同埋戴迪約克分擔到佢嘅工作，聯賽夾埋入咗成23球。拜仁借將卻奧斯亦好掂，一傳一射都好有功架，唔知拜仁有冇後悔將佢外借畀利華呢？另外，佢哋一對中堅希比亞同文奴費特列治都厲害，防守好之餘，仲識得入波，兩個人喺聯賽就合共入咗4球。
波琴歇冬後3場聯賽攞到1勝2和，但佢哋冇入波板斧；更何況，守力真係唔好，20場失成36球，點頂利華嘅強勁鋒線呀？呢場波要利華古遜W，要埋佢哋贏3:1波膽。
賀芬咸主場攞「威」
另外，漢諾威衰到貼地，連歇冬前在內喺德甲連輸5場，而賀芬咸今季係冇上季咁搶鏡，不過發揮算係正常，就撐主W。至於澳職嘅黃金海岸聯之前作客威靈頓鳳凰吞咗6蛋，但呢輪佢哋強勢，博佢哋贏波兼復仇成功，一於要「主其他」波膽。
文：青蛙仔
結餘$90,197
本金＄100,000（上周賺蝕+$138）
近5場往績：WW/WD