珍品難求，係靚貨固然唔怕等，備受激讚的FordFocusRS就係令車主等了又等的珍品。呢部短小精悍、備有300匹馬力的「小青椒」終於辣埋身，雖然香港已經係歐洲之外的首個銷售點，但都搞足成年先大駕光臨，全因歐洲條長龍都排到暈，咁巴閉，難怪連車手小嚐呢隻青辣椒後都唔多願起身啦！
記者：許維雅
攝影：伍慶泉
等10個月都值得
自1970年EscortRS1600首度面世後，唔少人聽見RS家族車系呢個名字都不禁兩眼發光，事隔40年，Focus第二度掛上RS銘牌，已經足以吸引唔少車主注意。新一代FocusRS以WRC世界越野錦標賽的落場戰車作藍本，外形上近乎完全一樣，加上機械工程研發上的突破，RevoKnuckle前懸掛設計及新式QuaifeATB限滑差速器，大大減低300匹馬力的前驅車會出現搶軚或推頭的問題，亦繼承了RS優良的越野血統。難怪08年尾一推出時即刻搞到歐洲大排長龍，全世界斷貨，香港代理幾經辛苦終於爭取到成為第一個歐洲之外的銷售點。新車主胡先生就大讚等幾耐都值得。「讀書時已經好忠於RS車系，我一知道有呢部車，喺舊年4月已經走去代理度放低張票落Order，開頭話未必有，我都無拎走張票，希望等到有為止。」
車手最冧桶椅
代理為隆重其事，特別舉行了一個交車儀式，更邀請了三位賽車手跟呢部揭背王親身接觸。雖然未可於賽道上一試真正實力，但三位車手對FocusRS都讚不絕口，齊齊話最欣賞就係車上的桶椅。奪了7屆全國小型賽車錦標賽總冠軍的Kenneth話：「好早前已經有留意呢部車，貪佢嘅外形夠惡、顏色夠Sharp，加上佢係由WRC演變出來，令你毋須懷疑佢嘅攻彎能力，呢一點已經係賽車手夢寐以求的Handling。我特別鍾意佢張桶椅，普通桶椅坐落去一係好硬、一係包唔晒，但佢出奇地包得好貼，可能車的性能上着重攻彎，所以側邊近腰嘅位置承托得好好，夾到實晒，唔會郁來郁去先可令人操控有信心。」至於剛贏得2009FordFormulaCampus總冠軍的Diana及為長安福特出賽的Andy都一樣冧張桶椅。「坐上去第一個感覺好舒服，包得好貼服，有賽車感覺。」Diana坐在司機位讚不絕口。
規格
引擎：2,522cc直五Turbo
馬力：300ps/6,500rpm
扭力：44.9kgm/2,300至4,500rpm
傳動：六前速手波，前驅
售價：$498,000
查詢：25031032（FordHongKong）