尚有一個星期便到新正頭，一班狗男女屆時會破籠而出，向姨媽姑姐利是；但深閨太久，個個變成宅狗，唔執靚個樣隨時嚇死街坊，當然要想辦法變身；最佳示範有兩位靚狗女雞髀同Katie，化行個新妝，有複雜有簡單，任君選擇，誓要以靚爆鏡造型同大家拜個早年：「祝大家虎年行狗運，天地有正氣！」
記者：蔡俊業
攝影：伍慶泉、梁細權
Katie
年齡：3歲
品種：貴婦
性格：文靜非常，整個化妝過程一聲都沒有吠過。
雞髀
年齡：2歲
品種：白北京
性格：精靈活潑跳跳紮，成個男仔頭，最叻頭岳岳同你傾偈。
隆重BearBear裝尾禡免加
要整個靚靚賀年Look，當然要專人出馬！所以今次我們邀請了「時代寵物美容學院」院長Sandra媽媽（張婉華）及靚仔哥哥翁Sir（翁裕華）幫手。他們都笑說，要幫貴婦狗打造新春賀年造型，通常都以「圓」為主題：即由頭部、到腳甚至尾巴，都要剪到圓碌碌先開心，「摟摟幽幽咁就唔太好喇！」Sandra媽解釋。所以他們將此定名為「BearBear裝」，Bear者，小熊維尼也。唔明兩者關係？記者都唔明，但總之可愛就得喇！
翁Sir說，一般狗仔由剪毛到着衫扮靚靚，起碼要花40至45分鐘時間，如果要染色的話時間更長，記者直擊整個「變靚啲」過程，發現非常複雜，相當花心機，可溫文爾雅的狗女Katie，過程中一聲都無吠過，梗係啦，全程都有專人服侍喎。
細個成日聽到大人話，剪髮尾禡雙計，原來幫狗仔搞造型一樣要，做狗真矜貴。Sandra媽媽回想昔日的賺錢光輝歲月：「以前過咗年廿七就工半，年卅晚就雙工，家經濟唔好，今年唔會加，照收正價喇！」
Steps
收費：一般基本美容到全身修剪，CupSize貴婦$450起，視乎狗種和造型難度。（b）
簡易版3分鐘極速染色
若然主人嫌之前那個造型複雜花時間，Sandra媽媽推介一個3分鐘極速染色造型。而且毋須帶寶貝到美容店，主人自己DIY也不難。她說，染色噴劑由台灣進口，共有6款顏色，不過新年要利利是是高高興興，當然不要用藍、綠色咁掃興，建議大家可以用粉紅、黃色及葡萄紅。至於噴色的位置，會決定狗仔的染色效果：「一般可以離遠少少噴，咁樣做即日去完Party返屋企冲個凉，或者隔幾日啲顏色已經自然褪晒，如果集中一啲去噴，就可能要幾個星期先甩，其實呢隻噴劑可以直接搽上去，能維持幾個月之久。」
Steps
DIY工具：染色噴劑，共6款顏色。提提寵物主人玩極速染色前一定要戴手套，以免顏料染污指甲。$98/支（b）
血拼唐衫
化完個新Look靚妝，着埋件賀年衫仔就更卡娃兒！除現成唐裝外，還有度身訂做服務，好處當然是可跟主人「親子Look」拜年，更實際的原因是，坊間趣致寵物衫以細狗款式較多，度身訂做則能更貼合大狗需要。
度身訂做
得意衫仔，大狗的選擇相對比玩具狗少，但原來有公司專誠為大狗度身訂做賀年狗衫和斗篷等，着出街去拜年，好英！但時近新年工半，以下價錢另加50%。（e）
10"背長以下$480
11"-20"背長$580
21"-30"背長$680
恭喜發財背囊
今時今日，人可利是，連狗仔都可以。替愛犬孭個印有「恭喜發財」的利是背囊出街，分分鐘帶挈你滿載而歸。$198（c）
傳統衫仔
唔知幾時開始，小朋友新春愛着唐裝，連狗也是。有黃色、紅、粉紅和黑紅暗花共4色選擇。$94-$169（a）
至潮斗篷
人界流行圍件披，狗界都唔執輸。紅彤彤的新年斗篷，是少有連大狗金毛尋回也合適之選。$88（d）
犬界大長今
嘩，過年遇上大長今?!此為獨家款式，由加細到加大碼都有。$168（d）
加映狗狗全盒
全盒有3款小食，包括乳酪糖、銀鱈魚包雞肉及雞肉乾包乳酪骨。福袋包裝夠意頭。$145（c）
送禮的話，可考慮新年禮物包，包括銀鱈魚雞肉、曲奇餅、玩具及糖果等。$198（c）
ShopList
a. DogOneLife（九龍灣店31055904）
b. 時代寵物美容學院（21554099）
c. PetMAX（21539991）
d. InDogHouse（35869820）
e. Goldenwater（98342287/ http://www.goldenwaterdogdog.com）