胡諾言太太陳琪舊年9月剖腹生咗囡囡芷苓（Jay），霎吓眼B女已經5個月大。榮升老竇嘅胡仔之前瞓身開工同拍廣告儲埋唔少，臨近農曆新年決定一炮過買新車代步，一擲約50萬買咗部豐田7人車，專供老婆同個女出巡，以及方便接埋屋企嘅長輩出街，而胡仔就梗係專職做司機，所以呢個廿四孝老竇同老公真係唔話得，夠晒體貼入微。
囡囡勁得意
噚日胡仔一家三口現身九龍灣嘅豐田車行買車，雖然有工人同行，但兩公婆全程輪流抱B，估唔到胡仔抱B都有一手，到囡囡鬼咁開心。着住斗篷仔嘅小Jay梳咗個冬菇頭，面仔紅紅又眼仔睩睩超趣致，雖然5個月大但體形就似1歲細路；反而胡仔夫婦就明顯瘦晒，特別係陳琪已經極速收身，仲fit過產前。
產後減42磅
事後馮仁昭同胡仔夫婦傾電話，陳琪話佢懷孕高峯期147磅，之後接受贊助做纖體療程，家落到105磅，瘦咗42磅，都咪話唔犀利。至於胡仔就有女萬事足，佢話B女笑容似媽咪，而且見人就笑，一對大眼同耳鼻就似佢喎！胡仔話阿女塊面紅卜卜，本來嗌佢做番茄，但前幾日佢親自幫個女剪髮蔭，家番茄嘅新朵就變咗蘑菇，體重足足18磅，認真夠份量，醫生同胡仔講過蘑菇小姐比同齡BB肥咗少少，胡仔話：「佢有少少雙下巴o架，但體重都正常嘅。我仲幫佢整咗胎毛筆同胎毛扇，家做乜嘢都係諗個女先，將所有嘢投資喺佢身上，所以我要再努力啲呀！」
