經常在星期五到陸羽飲茶嘅醫生Ｌ，呢排唔見露面，唔知係唔係醫務繁忙呢。呢日飲完茶，在大道中碰到醫生Ｌ一位「非醫務助手」，問佢呢排醫生Ｌ忙啲乜，點解飲茶時份都唔見。助手Ｓ話：「應該忙完喇啩，前一排醫生Ｌ同我哋忙於成立一個『世代無肝炎．免費乙型肝炎測試中心』，已經喺兩個禮拜前，即係一月二十三日星期六開咗幕，由周一嶽局長主持，你得閒不如上去拮番一針！」
無端端去拮針，貪好玩咩，咪制。但助手Ｓ搶住話：「喂，唔收錢o架，免費o架，十幾分鐘就有測試結果，你成日在外面飲飲食食，測試吓對你有利無害。」
免費打針咁好行當？測試乜嘢呀？助手Ｓ解釋：「都話係乙型肝炎測試中心咯，當然係測試你有冇乙型肝炎啦。拮針也者，其實唔係打針，只係在你隻手指篤一篤，抽一啲血出嚟檢驗測試，好快就知道你有冇染上乙型肝炎。」原來如此，好簡單噃，篤手指抽血，頂多痛兩秒鐘啫。
拜拜之後，助手Ｓ電郵更多資料過嚟，意圖說服左丁山去篤手指驗血，吸引力在免費測試！據講亞洲人帶乙型肝炎菌比率遠遠高於西人，現時香港有七十萬人係乙型肝炎帶菌者（估計），但大部份都唔知道自己帶菌，所以唔知道快啲去醫，最壞嘅後果就係出現肝硬化與肝癌，患病者多數在壯年時，即四十歲左右患上肝硬化，甚至不幸患上肝癌。老生常談，病向淺中醫，早日知道自己有乙型肝炎嘅話，早醫早着數。助手Ｓ附帶一句口號：「手指篤一篤，肝炎無得郁」，真係令到左丁山為之心郁郁，走去驗一驗！有意者不妨一試，如果真係「確診」，可立即搵自己嘅家庭醫生，由家庭醫生轉介專科醫生治理。
睇睇吓電郵，先至記得打電話問助手Ｓ：「究竟間免費乙型肝炎測試中心位在何方呀？」助手Ｓ答：「得中西區議會支持，提供場地，就喺中環吉士笠街十一號地下，於威靈頓街與結志街之間。周日每日十點至五點，星期六就由十二點到三點為大家服務。」