孔燦煇，59歲，孔子74代傳人，未有繼承祖業執教鞭，卻手握軚盤縱橫全港馬路逾30年。身為專業司機，載過英女皇理髮師與曾蔭權，人生路途最終仍是與教育界接軌，88年開始從科技大學出發，接送三任校長，員工證印上天字第3號的三朝元老。
短工變長工
時光回到70年代，孔燦煇在政府車輛管理處工作，負責駕駛VIP車。10年後被調派科大秘書處，負責接載創校校長吳家瑋，「我係管家同大廚之後科大第三個員工，校長就係第4號。本來係短期調任，之後吳校長問我可唔可以做落去，搞掂咗啲合約同福利安排就留低。」
科大被稱為「勞斯萊斯級」大學，校長專車不敢太有派頭，多年都用日本車。見盡三任話事人，孔燦煇與吳家瑋最熟稔，13年相處，最記得吳不愛坐後排「老闆位」，反愛坐司機位旁，「因為前座可以校後，佢可以伸長雙腳，舒舒服服坐車傾電話。」
吳家瑋閒時愛自己駕車，「有次佢車個朋友返酒店，轉頭架車就被人偷咗。」校長女兒也是校長座駕乘客，孔笑言是她的廣東話導師，「佢本來唔識講廣東話，我教佢講，好似去快餐店買魚柳包，結果唔使一個月就識講。」
長期服務獎
走了吳家瑋，來了台灣猛人朱經武，一待就是八年，「朱校長好勤力，禮拜日都會開工，佢臨離開科大，叫晒我哋一班家僕去佢度，叫我哋唔准郁，佢話我哋服侍咗佢咁多年，最後由佢同太太服侍番我哋。朱太負責煮西餐，校長負責上菜。」
然後是「香港仔」陳繁昌上場，孔燦煇對新老闆很客氣，表示感覺新校長做事有無窮魄力。21年光陰換來科大首屆長期服務獎榮耀，孔燦煇昨領獎後稱，要做到65歲退休為止，「好老闆難求，出去都未必搵到，何況現在我都算係做教育工作，真係會有些少榮耀同驕傲o架。」
記者 夏志禮