佘詩曼同鄭嘉穎甩拖後緋聞繼續精采，近日又傳阿佘同陳豪撻着，鄭嘉穎惟有默默開工，噚日同蒙嘉慧喺西貢拍攝無綫劇集《OnlyYou》一場汽車爆炸場面，火燄冲天，鄭嘉穎同蒙嘉慧要面對戲中好友黎諾懿同姚子羚俾車撞死，喺鏡頭前呼天搶地，蒙嘉慧仲喊到露晒股罅都唔得閒理，好鬼逼真。
原來套劇都就快收爐，個個都趕住過農曆年、情人節，可能為免孤伶伶，嘉穎一早計劃好離港度歲，情人節仲要趕坐飛機去見家人，嘉穎話：「我拍埋套劇會先去多倫多，年三十晚登台，初一會坐飛機去拉斯維加斯見屋企人，之後會繼續去洛杉磯做嘢，今個新年好充實。」
嘉穎呻冇情人
所謂工作得意情場失意，嘉穎話：「我好明顯冇情人啦，但唔到我揀，有一樣已經好好。」嘉穎又話唔信阿佘同陳豪拍拖，笑笑口話：「唔使太在意，冇病嘛，唔會問佢哋，傳實有，但奇怪在今套劇我都冇同蒙嘉慧傳緋聞。」
相反同男友感情穩定嘅蒙嘉慧就唔使憂，情人節屋企人行先，又會同大班朋友打邊爐，仲話：「可以成班人食嘢男朋友會開心過我，要二人世界隨時都可以。」
