周秀娜和周柏豪昨日出席足球專門店活動，雙周原來很喜歡欣賞英超賽事。周秀娜覺得英超球星禾確特（TheoWalcott）好波，直指他「好勁」而迷上，主持即取笑她也很勁。周柏豪則透露有留意英超球星泰利（JohnTerry）被踢爆搭上隊友女友一事，但他竟指泰利的偷情行為「好勁」。
周秀娜和周柏豪昨日到尖沙嘴出席足球裝備專門店開幕禮，兩人除了示範踢波外，更獲贈球衣。周秀娜透露因長期戴隱形眼鏡，缺乏時間休息致眼睛發炎。
原來周秀娜愛睇英超，最喜歡的英超球員是禾確特，她大讚禾確特好波，又說：「覺得佢勁囉，跑得快。」司儀聞言即取笑她說：「你都好勁o架。」周秀娜只好以笑遮醜，之後續說：「細個喺屋企，阿哥同細佬成日都開住足球台，日日都睇咁滯。」
周柏豪羨慕泰利
周柏豪表示最愛籃球和足球，被問到英格蘭國家隊隊長泰利偷腥一事時說：「有留意，想知佢點解咁犀利，覺得佢好勁，睇報紙見到成個list咁。」周柏豪續說：「我都鍾意睇足球，幾萬人一齊喺球場入面圍住睇波，氣氛好好，之前香港足球隊成績咁好，我身為前香港籃球隊代表都覺得好驕傲，佢哋幫香港運動員爭咗一大啖氣。」
另外，早前打算接受激光矯視手術的周柏豪接受電台訪問，透露因眼角膜呈尖錐形，故此要押後手術。
周柏豪說：「醫生話可能太細個開始戴隱形眼鏡，所以變咗形，如果繼續做劇烈運動或者捽眼會好易爆，家要改期做手術。媽咪之前陪我去覆診，仲同我講，要眼角膜就攞去啦，聽到我眼濕濕。」
採訪、攝影：藍文浩
