熱刺嘅英格蘭前鋒迪科爾雖則爛蒲爛玩，但就聽教聽話，將前輩講嘅一字一句都記晒入腦。前晚喺英足盃第4圈重賽，佢大演帽子戲法幫熱刺作客贏列斯聯3:1，賽後佢話全靠名宿費迪南威脅要打佢籮柚，佢先至會咁叻。
怕費迪南打籮柚
前晚場波，迪科爾喺37分鐘幫熱刺開紀錄，不過喺半場前俾列斯聯追成1:1。但喺更衣室返出嚟後，迪科爾如有神助，結果73同90分鐘再省兩粒，最後助球隊贏3:1晉級。迪科爾賽後話：「半場休息嗰陣，教練費迪南同我講，如果我唔能夠大演帽子戲法，佢就會打我籮柚。初段我有唔少機會，可惜都一一錯過咗。但我知道只要繼續努力，機會就陸續有嚟，我一定可以完成目標。」
熱刺領隊哈利列納開玩笑咁講，迪科爾應該入到6球：「迪科爾機會多的是，佢應該有雙倍入球至真。」計埋呢3球，迪科爾佢喺今季總共入咗20球。
今次係迪科爾喺今季第3次入到3球或者以上，之前係舊年11月底佢入5球，幫球隊喺英超主場大數韋根9:1，賽後佢好識做，話全靠平時睇助教兼名宿基夫阿倫以前嘅比賽錄影帶，以及對方臨場提佢，叫佢唔着贊助商對新砵，着番舊砵先可以入到咁多波。佢有兩大射手做軍師，而且聽教聽話，睇嚟仲有可能第4次甚至第5次轟入3球或以上。
淘汰列斯成第3熱門
熱刺出線英足盃16強之後就會對保頓，而熱刺就以7.5倍同阿士東維拉並列第3熱門，緊隨車路士（2.5倍）同埋曼城（5倍）之後。外國有莊家開由倫敦球會包辦連贏位嘅賠率係9倍，我求大俠都希望見到熱刺同車路士齊齊入決賽。