臨近農曆年，人頭湧湧何止尖沙嘴、銅鑼灣，辦年貨勝地上環「海味街」（德輔道西），同樣人車爭路，擠得水洩不通。大包細包當然揸部車幫幫手就最方便，不過要在上環搵個車位似乎仲難過揀到靚海味，想快人一步泊到靚位，記住認清目標停車場，記實行車路線，因為稍一不慎都會搞到你兜圈兜到暈。
記者：許維雅
攝影：黃子偉
最多車位最闊落
干諾道西118號$25/小時 （a）
要喺經常都人山人海嘅海味街一帶搵位泊車都有計，喺最多海味舖林立嘅頭段附近，設有時租車位嘅停車場就有三個。干諾道西118號就係其中一個，亦係最多車位嘅一個，約有40-50個車位，部份設於斜路嘅車位需要露天停泊。雖然拍攝當日都要等位，但勝在流量大，等了數分鐘已經有位。唯一缺點係時租車場只得一層設於五樓，要轉足五層先到，經常遇到對頭車，不過環境已算最新淨，車位最闊落。可能近排車位需求量大，見到車場貼上每小時$25嘅新價格，最易有位，難免收費最貴。
地點：干諾道西118號
入口：威利蔴街
點去：沿干諾道西往西環方向，左轉入威利蔴街即見車場入口。
貼士：高度限制1.9米、只收現金。
泊車有人代勞
中銀信用卡中心$20/小時 （b）
海味街附近屬於舊區，停車場都偏窄偏舊，對於泊車新手而言，難度都幾高，若然有人代勞就最好啦。中銀信用卡中心停車場門口就有兩位大哥站崗，他們禮貌地叫停記者入閘，因為車場已滿，有位嘅話，他們亦會幫手代人客泊車。兩層車場約有30-40個車位，部份車位設於死角，需要留匙。由於車場位置易搵，離開時亦毋須兜入內街慢慢塞，十分方便，所以較難等位。
地點：干諾道西68號
入口：干諾道西
點去：沿住干諾道西往西環方向，經過皇后街後不久即到。
貼士：高度限制2.2米、只收現金。
最考技術
粵財大廈$20/小時 （c）
最後一個停車場係粵財大廈，地方最細，兩層加埋只得20-30個車位，上二樓要搭車，地面部份車位更要上車架，算係最難泊，不過設於地面嘅優勢亦吸引不少靚太快泊入貨。
地點：干諾道西88-91號
入口：修打蘭街
點去：沿干諾道西往西環方向，左轉入修打蘭街即見。
貼士：沒有高度限制，但上二樓要搭車，只收現金。
最平之選
均益大廈$12/小時 （d）
想泊多幾個鐘慢慢揀，可以去遠少少嘅均益大廈，因為收費平好多，車位亦夠晒多，有60-70個車位。步行來回最多海味舖嘅地段需要5-10分鐘左右，可惜車場三尖八角又多柱，十分難泊。
地點：德輔道西271-285號
入口：干諾道西
點去：沿住干諾道西往西環方向，過了高樂花園便到。
貼士：高度限制1.9米，接受八達通付款。
咪錶位難求
海味街附近極少咪錶位，除了較近嘅高陞街有少量錶位，比較多錶位就係沿東邊街上大斜路嘅幾條橫街，不過數量有限，亦係常滿，有排等之餘亦要辛苦行斜路，可免則免喇。
泊得醒貼士
1.該區大部份係單程路，一旦駛入橫街或者德輔道西就有排兜，最好搞清想去嘅停車場先出發。
2.認住東邊街，萬一錯駛入德輔道西想回頭，東邊街係最方便掉頭嘅地方。
3.唔好諗住泊喺德輔道西兩旁偷雞快買，因為路邊多被落貨車及海味貨阻塞，有人睇車都難搵位。
阿太教路
掃慣貨嘅何太（右）及張太話，平日多數泊干諾道西118號，不過諗住今日嗱嗱臨買，唔會泊太耐，所以泊喺粵財大厦門口夠方便。
