李雲迪（圖左）今晚同聽晚會喺文化中心同香港管弦樂團開音樂會，噚日舉行記者會，文化中心竟然有兩個李雲迪一齊出現，原來係上海杜莎夫人蠟像館借出嘅蠟像。李雲迪話自己都係第一次見個蠟像，覺得好得意，仲大讚製造蠟像嘅工作人員。雖然佢曾經被影到同靚女一齊喺香港出現，但係記者問到佢有關女朋友嘅問題，佢都只係答順其自然喎。