泛民五個議員辭職，建制派接到阿爺柯打，即時勒住唔去馬補選，不過佢哋玩杯葛未必貫徹始終，始終覬覦一啲議員辭職後出缺嘅位置。五個議員辭職後，佢哋原本參加嘅立法會事務委員會、小組或調查委員會都要搵人頂替，據知泛民已有共識，出缺位置由所屬政黨議員頂上，社民連三子一件不留，空缺就由獨立民主派議員接班，飯盒會今日會詳細討論相關人選。
由議員互選做中大校董嘅毓民，辭職後自動離任，據講校友關注組、職工會屬意余若薇接任，佢亦樂意為之，不過聽聞建制派對呢個位都有興趣，今次可能唔杯葛會角逐。據八方所知，泛民同建制派曾非正式討論如何填補空缺，建制派表現大方，但最終是否杯葛到底唔同泛民爭，暫時未說得準。