前高官羅范椒芬被指干預學術自由離開官場，過去兩年十分低調，虎年終於重出江湖，接受科大理學院「伯樂計劃」邀請做導師，更會親自教學生兩文三語，強勢回歸教育界。
羅范做官時，01年10月曾經發表金句勉勵被裁員人士，「中產失業人士可以考慮去教書。」原來佢講得出真係做得到，下個月起會喺佢屋企開班。羅范掌管教育時唔肯落實小班教學，自己執教鞭卻堅持小即是美，好似日劇《女王的教室》個惡死教師天海祐希咁講，「只有6%的人能得到幸福。」有幸入讀羅范私家教室嘅學生一隻手數晒有餘，因為佢最多只收四個學生，更指明要語文基礎弱嘅先可以上堂，會同佢哋以英文、普通話討論時事。
兩明星主播出席講座
現為家族慈善基金會主席嘅羅范，據講無官一身輕容光煥發，忙於做義工及家族內地辦學事宜，由於佢熱衷教育工作，又係教育碩士，只教區區幾個學生，明顯大材小用資源錯配浪費人力，八方相信佢遲早會在教育界再有作為。
羅范再踏足本地教育界，即有機會見到「老朋友」，因為「伯樂計劃」仲搵埋鮮魚行學校校長梁紀昌做導師，想當年羅范在位時曾經好唔客氣批評梁校長，想「殺」其校而後快，今日鮮魚行獲評價甚高，羅范與梁校長碰頭，應該好多話題慢慢傾。
「伯樂計劃」星級導師仲包括now首席主播李臻，下月22號佢會同女主播「小飛俠」林燕玲出席講座，講吓理學院畢業生出路，因為兩人都係理科生，讀理科唔一定做研究，做主播都得，希望有兩個明星主播做人辦，可以幫補生源。
任志剛允做兼任教授
科大理學院王牌活動「知識無限」講座，繼邀請o靚模周秀娜做嘉賓後，再請到份量十足大人物到科大講嘢，就係金管局前總裁任志剛，據知任總已答應科大商學院做兼任教授，稍後會為理學院學生做講座，「知識無限」講座先有嘅模，又有任總，未來幾個月白先勇、劉再復等文學家會陸續登場。
mailto:[email protected]