蝦餃媽陳慧琳（Kelly）昨日出席迪士尼賀年推廣活動，更展出她設計的K&M系列。Kelly透露忙於為蝦餃囝囝劉昇找中國服飾過新年，懶理近月四大唱片公司與無綫的版稅糾紛，她認為張學友建議四台統一頒獎禮是嘥氣不可行，並表示願意亮相亞視宣傳唱片。
陳慧琳昨日以D&G牛女晒長腿造型，現身迪士尼「虎虎生福」的農曆新年推廣活動，同場展出與迪士尼合作的K&M系列。問她會否帶蝦餃仔劉昇到樂園過新年？她說：「之前拍MV，佢哋嚟住過酒店，家忙緊搵囝囝新年服飾，本來想搵財神造型，不過搵唔到衫，都係會着中國服。」
不怕新片受影響
早前千嬅透露新年要抽時間出席家族成員團拜活動，Kelly對此說：「我就隨意，都要跟小朋友嘅食飯同瞓覺時間，所以都冇規定，家佢最鍾意食香蕉同蛋糕。」
對於四大唱片公司與無綫因版稅問題決裂，Kelly有份客串演出電影《72家租客》會否受到影響時，她說：「我喺戲入面做番自己做歌星，都唔會受到影響，加上首歌都係講70年代，都唔係要宣傳。」會否有興趣為亞視拍特輯，她說：「睇吓係乜性質，如果係宣傳唱片都會考慮。」
每台各自有規則
至於學友建議統一四台的音樂頒獎典禮，Kelly笑說：「嘥氣，唔會發生，我10年前已經同意咗，不過冇乜可能，每個台都有自己規則。」
採訪、攝影：林妃
