去年忽然成為頭條新聞人物嘅白鴿黨甘乃威，修心養性幾個月，踏入虎年終於出山，據講會同張文光、高達及其他朋友，自組旅行團遠征非洲埃塞俄比亞，趁農曆年假期避年兼轉運，與甘威同行者相信對佢都非常有好感，否則全程10日隨時反枱而歸。
團友之一張文光同八方講，由於當地衞生狀況麻麻，所以佢哋幾個人已打齊黃熱病、瘧疾、肝炎三支防疫針，幾十歲人打針痛到佢嗌阿媽，但命仔緊要，痛極都要捱三針。打針之外，有人話最好帶埋蚊怕水、止屙、止嘔、止暈藥，途中有小毛病都可自救。
一般人對埃塞俄比亞印象只係饑荒，其實係有幾千年歷史嘅文明古國，張文話去得呢啲比較落後嘅地方，已經預咗唔係喪食狂買癲玩豪華團，旅行社方面已提醒佢哋當地冇冷氣，怕熱嘅要有心理準備。張文話希望唔好咁熱，已預咗要忍受食、住差啲，不過係難得體驗，人一世物一世，點都要試吓。