歐鎧淳教你戴Con？冇錯，呢位17歲「小美人魚」有個新隱形眼鏡廣告面世（ http://hk.asia.acuvue.com/av/acuvue-teens/）。
我求大俠見過唔少香港體壇靚女運動員，淳淳都算係「極品」，除咗樣靚兼讀名校精英班外，仲叻到代表港隊出戰奧運。淳淳近排仲成為廣告界新寵兒，前排先拍完化妝品廣告，今次就輪到隱形眼鏡啦。身為泳壇健將嘅淳淳，喺廣告入面自爆唔少秘密，原來佢讀小學4年級時已經戴Con；廣告入面仲有佢細細個戴眼鏡跳芭蕾舞嘅珍貴照片。家淳淳有成300幾度近視，你覺得佢戴眼鏡定係戴Con好呢？