上星期馬頭圍唐樓倒塌後，特首煲呔隨即到場巡視，保安局局長李少光傍住老細，當煲呔喺現場同傳媒講嘢時，企在後面嘅李少光表情輕鬆，有市民喺電視睇到局長好似偷笑，認為慘劇後高官嬉皮笑臉太不該，去信李少光批評佢冇同情心，對災民唔體恤兼唔憐憫。
李局長對市民呢個意見嚴正處理，隔日就指示下屬回覆作出投訴嘅市民，先對當日表現引起不必要誤會表示抱歉，又解釋當日抵達災場，心情一直十分沉重，煲呔講嘢時，李局長一直「輕咬着唇邊，強忍心中的悲痛。」八方睇過李少光被指偷笑段片，覺得佢表情不太自然，但身為高官，應該唔會公然幸災樂禍嘅。