里昂風水指數每年例牌會幫精選嘅財金名人算一算運程，今年入圍六個名人中，除咗股神呢啲正路之選，竟然有近期人氣逼爆嘅o靚模周秀娜，成功由娛樂版殺入財經版。
周秀娜以小博大有斬獲
里昂話，肖牛既周秀娜有沉着、冷靜、勤奮、倔強同堅韌等特質，只要睇準目標，就會將佢收歸囊中；財運方面，6月可能有以小博大嘅斬獲。
至於兩位同肖馬嘅股神畢菲特同比亞迪（1211）總裁王傳福，舊年合作非常成功，運程話兩人今年運程順利，從風水角度看，畢菲特原來喺虎年先開始佢一生中財運最好嘅時期，仲話今年有望喺中國取得不尋常嘅重大進展。
已經成為中國首富嘅王傳福，里昂話佢嘅好景唔係曇花一現，今年肯定更上一層樓，言下之意唔通指比亞迪未升完？！
四叔賣樓呎價可破7.1萬
至於肖兔嘅香港股神四叔李兆基，今年會獲上天處處眷顧，里昂就預言佢今年虎年賣樓可以打破舊年呎價7.1萬蚊嘅紀錄。
信德集團（242）董事總經理何超瓊同玖龍紙業（2689）張茵兩大女強人，今年亦俾里昂列入算命名單。
肖虎嘅何超瓊雖然犯太歲，但從星相圖睇，今年可能係佢人生中最好嘅年份之一，而且財運興旺。肖雞嘅張茵就因為玖紙9月可能有出人意料之舉，會為佢如日中天嘅事業錦上添花。
李華華
mailto:[email protected]