多年前有套票房一般嘅青春偶像電影《初戀無限Touch》，男主角窮家子陳曉東扮名校喇沙仔，追就讀瑪利諾嘅有錢女梁詠琪，八方以為做戲咁做，原來現實中真係有咁嘅事，故事主角係男、女拔萃學生，不過角色倒轉，扮名校生嘅係女生，男拔生係「受害者」。
男拔校長張灼祥噚日爆料，透露兩年前一名中六生一段校服誘惑「奇」緣。話說有個男拔生識咗個中六女生，女生聲稱就讀女拔，由於個女仔成日着住女拔校服見男朋友，又叫男友喺女拔校門接放學，所以個男仔從來冇起疑心。
買埋校簿做道具
不過女拔校方卻發現有問題，事關呢個「女拔生」不時會喺校門畀錢叫低年級女拔生幫佢買校簿，後來校工覺得奇怪，點解個低年級生成日買高年級生用嘅校簿而唔自己買呢？追問之下，終於揭發原來個女仔冒充女拔生，唔只着女拔校服，為求逼真，仲買埋校簿做道具。
由於事件涉及男拔生，女拔校方將件事通知張灼祥，張校長話知道後都O咗嘴，不過感情問題係學生私事，所以冇問個男生發生乜事，亦唔知東窗事發後兩人仲有冇一齊，現時男生已畢業離校，佢估計個男仔知道俾人呃之後一定好傷心。
張校長又話，女拔校方同佢講，個假女拔生本身喺觀塘地區名校就讀，事後要社工輔導。八方唔知道男拔生係咪好難追，所以個女仔要用女拔校服「誘惑」男仔，張灼祥亦話唔知個女仔動機，佢指男、女拔合唱團有好多校際活動，所以男拔生大把機會識女拔學生。
反對學校收女生
一般人可能以為男、女拔學生都以對方為拍拖對象首選，有舊生則話其實唔多，因為男拔生覺得女拔生眼角高，非正式統計，男拔生反而對協恩、聖瑪利女生多啲好感。張灼祥話好鼓勵學生參加校際活動，近年亦安排學生同庇理羅士、聖士提反女校交流。
話雖如此，卻有九成男拔生反對高中收女生，令校方被迫中止計劃，校內民主牆意見係咁：「向豬扒說不！向遺憾說不！」「收女仔要養眼少少，唔要豬扒。」張灼祥指學生可能唔鍾意有女生一齊競爭，先有呢啲講法。
mailto:[email protected]