除咗幫名人算命，里昂當然亦有幫港股把脈，該行中港兩地資深機構銷售員陳麗妍話，既然今年係金虎年，老虎除咗勇猛，仲精力充沛，成日跳跳紮，做嘢永遠出人意表，即係話，今年個市會好波動，但有危先有機，市況波動反而造就好多投資機會。
短炒長揸 家可入市
陳麗妍仲話，短炒嘅話應該家入市，月底就可以沽貨獲利，6月同9月恒指仲有兩個大升浪，睇啱時間掃貨，隨時賺個盤滿缽滿；若然唔想短炒，家掃貨長揸到年尾都得。講得金虎，同金有關嘅有色金屬股將會大旺，屬木嘅紙業股都唔錯，但就要小心屬水嘅航運航空股。
樓市又點睇呢？佢話虎年樓市先強後弱，豪宅表現會較好，尖沙嘴、沙田及西九龍呢啲位處中心地帶嘅地區會較旺，相反東北、西南及南區就濕滯啲，港島嘅話就推薦渣甸山同跑馬地。