年近歲晚，庚寅虎年將至，有一位長期讀者心水清，來電郵問：點解仲唔講吓梁玳寧之團年、開年吉日吉時等等？呢位讀者仲講明，近幾年佢依足晒團年開年之吉日吉時，自覺順風順水，故此要求左丁山快啲寫。
可惜呀，可惜，梁玳寧已經不在塵世，冇佢通知與批准，左丁山不敢覆述他人之言。本來有校友指點，可以搵高人請教，但高人家居清靜離島，大概唔想到空氣污染到極嘅中環，左丁山又一時之間無法抽空往離島一行，於是至今緣慳一面，此亦天意乎？
如果照通勝指示嘅話，今日已是己丑年丁丑十二月廿一日，團年好日應是二月五日星期五（下午五時至十一時係吉時），二月十日星期三（七時後），與二月十三（年三十晚，五時後）。虎年開年日聽講最好就係年十二（二月廿五日星期四早上九至一時），但好多人根本不能放假咁耐，只有老闆先至可以揀到年十二先至返工，左丁山就折衷地選咗年初九為虎年開工日。年初六都得嘅，但吉時要中午一點後，刁鑽啲噃。
埋年埋尾，有事嘅老人家要特別小心，睇訃聞，呢個月有三位傳媒界老前輩逝世，就係前《大公報》總編輯李俠文，前「華僑日、晚報」著名財經專家馮連均（筆名李志文）及《TextileAsia》創辦人兼總編輯宋凱沙（德祥），三人均積閏享壽九十有餘歲。左丁山不識李俠文，與馮連均及宋凱沙就有交往。馮先生真名少人知，筆名李志文就名滿財經評論界，六十、七十年代無人不識，佢曾經在九十年代親自指點過左丁山。佢一位女婿賓架呂係以前銀行同事嚟，大女婿係港大校董會主席、行政會議成員梁智鴻醫生，係人都識啦。至於宋凱沙先生曾任《遠東經濟評論》總編輯，後創辦英文雜誌《TextileAsia》，批判紡織配額不遺餘力，又做過香港經濟學會會長，左丁山係會員之時，同宋前輩在FCC吃過幾次飯，聽佢講紡織經營、國際紡織貿易制度，聽到心悅誠服，宋老去世之後，香港恐怕無人繼其衣缽咯。