人稱阿牛嘅曾健成，在社會運動中永遠走在最前線，民間電台事件，他冒着入獄之險，仍堅拒繳交區區三千元罰款。有人可能覺得他是一頭蠻牛，但身為車主嘅佢，在馬路上卻小心謹慎，相反在美國讀書嘅大仔Martino，年僅二十五歲，已有三部車在他手上報銷，一個50後，一個80後，揸車心態確實有天壤之別。
記者：趙慧敏
攝影：伍慶泉
50後阿牛
駕駛戰績：揸電單車高速劈落大帽山，導致屍橫遍野（係蚊屍）！按：事發於後生嗰陣。
揀車要求：最緊要係實用慳油。
80後牛仔
駕駛戰績：駕車七年，三部車在手上報銷。
揀車要求：最緊要係操控性，越難控制越有挑戰性。
過期荒唐歲月
橫衝直撞係蠻牛嘅本性，阿牛亦曾有一段開快車嘅荒唐歲月。「後生時，唔止鍾意開快車，仲要玩埋電單車，試過成班朋友揸電單車高速劈落大帽山，停車時，發現大家車頭燈、頭盔都係蚊屍，點解？因為車速太快，所以連蚊都撞死囉，哈哈！」不過隨着結婚，有埋兩個兒子，車亦由玩具變成代步工具。載一家大細外出時，最擔心係小朋友多手多腳。「試過我揸緊車轉彎時，兩個仔突然打開車門，好彩無飛出街，真係俾佢哋嚇死。」身為一家之主，當然要以保護家人為重，開快車已經唔係佢杯茶，阿牛說：「家我揀車最緊要係實用慳油。」不過Martino則暫時未認同這一套，自小愛上汽車嘅Martino，對任何車都充滿好奇，未能擁有都想一過手癮。「美國有好多車展，車廠都會提供DemoCar畀參觀者試揸，真係好過癮。」
最想揸F1
唔好睇小Martino只有廿五歲，由十八歲開始揸車，對任何車款都瞭如指掌，但最「厲害」之處係小小年紀，已經有三部車在他手上報銷。「第一部豐田bB，俾一隻鹿衝向車頭，自己無受傷，但部車就報銷。第二部係HondaAccord，性能相當好，不過我因為開得太快，失控撞埋牆。第三部紳寶，有Turboo架，不過我踩得太盡，結果副偈都踩爆咗。」現時Martino與弟弟在美國共用一部Mazda3。不過Martino卻矢口否認自己鍾意開快車，認為只係喜歡挑戰技術。記者借來一部Audi高性能嘅S5給阿牛兩仔爺試揸，坐上駕駛席一刻，從眼神已感受到Martino嘅興奮，「呢部車係我揸過最高性能嘅一款，真係好夠力，一畀油就去……」雖然極少在香港開車，但Martino仍信心十足，揸住呢架有成354匹馬力嘅S5喺清水灣飛馳，反而旁邊嘅阿牛一臉認真，不斷提醒Martino路面狀況，一派慈父本色。滿以為Martino心中嘅DreamCar一定離不開Supercar，佢偏偏就說「不」。「Supercar用錢就買到，但車除咗講性能，最緊要係操控性，如果可以，我最想揸F1。」80後果然不一樣。
規格
引擎：4,163ccV8FSI
馬力：354bhp/7,000rpm
扭力：440Nm/3,500rpm
傳動：6速Tiptronic自動波
售價：$799,000
查詢：合迪汽車（25281862）