張致恆（Steven）和鍾舒漫甩拖後事業直線下滑，但身邊女伴繼續轉不停，日前他才偕短裙艷女蒲老蘭，前晚卻又換畫且品味突變，留鬚渣及揸鐵騎的Steven以極man造型亮相，跟豬膽鼻長髮新歡到西環嘆串燒，席間男方猴擒食相盡現人前。
本報於上周六才拍得張致恆相約長髮短裙艷女蒲老蘭，事後有指該艷女是擁36D巨胸的內地21歲性感模特兒張馨予，未料這邊廂張小姐剛登場，那邊廂Steven已偕新歡於前晚去西環嘆BBQ串燒撐枱腳，其換畫速度快過打針。
前晚Steven戴cap帽、留鬚渣，看來精神麻麻，同行女伴則留長髮及有豬膽鼻，身形略圓潤，兩人約於9時抵達位於西環第三街的BBQ食肆，並點了粟米及雞翼等食物。大抵Steven飢腸轆轆，猴擒食相毫無儀態任睇，坐對面的長髮女伴卻不介意，全程冧笑，跟他有傾有講。
媾女戰績彪炳
約一小時後開餐完畢，由Steven負責埋單，接着二人步往附近一家寵物店，Steven拎鎖匙開門內進，長髮新歡則企門外煲煙，及後男方離開店舖，與長髮新歡欲斷難斷吱吱噚一輪後，才逕自登上已泊在場的一輛Honda電單車絕塵而去，新歡則幫忙為寵物店閂門，再獨自前往附近的廣豐臺。
其實Steven媾女戰績彪炳，去年他曾被揭網交，之前又被指因與鍾舒漫拍拖而飛甩舊愛傅珮嘉。不過隨着鍾舒漫在樂壇漸有成績，兩人距離越來越大，早於去年已開始感情轉淡。
採訪、攝影：李志明、黃文偉
