加利尼維利早排向泰維斯舉中指一事,喺唔少網民眼中係擦鞋仔討好領隊嘅行為;如果係真,加利仔呢鋪都算擦錯鞋。皆因佢中指一出,影響球會形象,令費Sir龍顏大怒,有傳已經將加利仔放入雪櫃,喺佢今季尾退役前唔慌多落場機會。講開泰維斯,我諗球迷仲記得季前一張以佢畫像,寫住歡迎到曼市嘅宣傳海報,原來泰維斯都keep咗一張,仲將佢掛喺阿根廷嘅屋企㖭!不過睇見加利仔嘅個案,我求大俠奉勸泰維斯都係專心喺球場爭取表現,咪搞咁多嘢啦。