雖然陳豪同廖碧兒已經分咗手，但係外界仲一直當佢哋係一對，不過近日有傳陳豪同佘詩曼合作拍無綫古裝劇《公主嫁到》，男方以咖啡攻勢冧掂女方，仲言之鑿鑿話陳豪因為咁俾廖碧兒爸爸教訓。噚日無獨有偶，三位主角分別出席活動，阿佘噚日去跑馬地馬場出席賀年活動，佢會擔任馬會大使，初三會喺馬場獻唱，由於當日會有5,000萬三T，阿佘笑笑口話希望獨中喎。
對於同陳豪嘅緋聞，阿佘笑住話：「只係緋聞勁，唔係桃花呢！」阿佘除咗否認同陳豪嘅緋聞外，竟然話一早為男方準備人情，但佢唔肯透露陳豪嘅真命天子係邊個，不過阿佘承認：「我係飲過陳豪煮嘅咖啡，但佢唔係只請我一個，係萬歲請。請我飲咖啡又唔係買間屋畀我，唔好因一杯咖啡搞到咁大件事。」
阿佘呻當災
阿佘又笑稱自己唔係當事人，只係當災人，只係路過俾人扯落水，佢話其實呢單緋聞真係唔會有人信。
另一女主角廖碧兒就以低胸裝喺上水出席活動，佢若有所指話情人節冇情人陪佢過。至於陳豪同阿佘嘅緋聞，碧兒好坦白咁話：「我冇時間問朋友，係真係假都好，但係爹哋就投訴話張相影得佢唔靚仔。」
男主角陳豪傍晚時分去尖沙嘴出席眼鏡店活動，講到同阿佘嘅新戀情，陳豪妙語連珠話：「《宮心計》時又唔傳，嘉穎唔喺度先傳，係恰我定恰嘉穎先？」同阿佘係咪拍拖？陳豪話：「我一樣係以前嘅阿Moses（陳豪英文名）咁簡單，希望緋聞都係咁簡單。」陳豪見招拆招，仲形容現時同阿佘及碧兒關係似大家庭中嘅兄弟姊妹。