求驗客手記:杜麗、龐偉一夜槍神搞大咗 - 求驗客

求驗客手記:杜麗、龐偉一夜槍神搞大咗 - 求驗客

中國運動員喺世界體壇地位越嚟越重要,08年京奧更憑主場之利,成為最多金牌國家;唔知係咪為咗畀優良嘅運動員DNA延續落去,唔少中國精英運動員都結為夫婦,「女槍神」杜麗唔只嫁畀同屬中國射擊隊成員龐偉,更加傳出有喜,預產期傳聞係今年8月。
龐偉同杜麗上年11月29日先喺保定結婚,計一計杜麗嘅預產期,如果佢哋婚前冇「曳曳」,即係結婚冇耐,京奧10米氣手槍金牌得主龐偉就「一擊即中」,睇嚟佢嘅造人技巧同射擊技術一樣咁準繩。
其實杜麗婚後都未歸隊,噚日就向眾多好友發短訊:「由於身體特殊原因,前段時間一直未使用手機,沒有和大家及時溝通感情,很是抱歉!在接下來的半年時間內還需要盡量避免手機輻射,請見諒!順便提前祝福各位春節快樂。」

姚明「復出」罰球超準

作為兩口子證婚人,身兼中國射擊隊總教練嘅王義夫,就好似就嚟做爺爺咁開心;王教練結婚當日已表示:「你哋嘅小孩未來也要成為射擊運動員!最好生兩個,一個代表河北,一個代表山東,最後代表國家隊為國爭光。」如果累積兩面奧運金牌嘅杜麗聽從王教練吩咐,肚皮就有排唔得閒喇。
中國頂級運動員虎年添丁嘅,又點止龐偉同杜麗夫婦。NBA火箭中鋒姚明,佢老婆葉莉預產期係今年6月;或者因為初為人父嘅動力,姚明亦漸擺脫傷患陰影,周一到火箭主場豐田中心練習射罰球,100球中92球!
以往農曆新年期間,NBA唔係打緊明星賽,就係常規賽如火如荼,姚明唔使旨意返家鄉過年;不過今年佢因為養傷,所以本月10日就可以攞假返上海過年,之後先歸隊。不過火箭訓練員已經警告姚明,過年都唔可以大吃大喝,唔係變咗「肥明」返侯斯頓,就有排先操番「弗」!

杜麗累積兩面奧運射擊金牌,勢將優良DNA延續到下一代。資料圖片