1.16反高鐵示威者包圍立法會當晚，聞說有唔敢離開嘅保皇黨議員，喺立法會內開威士忌、嘆雪糕。佢哋打劫咗香港人669億之後暴食自肥，但係又對反高鐵示威者喺立法會外搞美食嘉年華睇唔過眼，勇字當頭嘅民建聯功能組別議員葉國謙，繼打電話畀警隊一哥施壓之後，噚日又喺立法會保安事務委員會發炮，質問保安局同警方代表，知唔知有示威者喺立法會外煮食，又煮湯圓又整缽仔糕，問政府究竟會唔會跟進，覺唔覺一旦發生意外好危險？
當日示威者準備嘅食物包括「功能組別一嚿飯」飯糰、民主魚蛋等「應景」小食，莫非崩口人忌崩口碗？定係功能組別議員問政質素特別高，先問得出呢啲咁有見地嘅問題？