新任中國足球掌舵人韋迪（圖），日前召開上任後首個幹部大會，直指中國足球內部存在6大問題，亦訂下多條「家規」，其中一個最令我求大俠感到騎呢嘅，就係嚴禁官員出差時享受桑拿浴同埋沐足，一旦有人違反，將會嚴懲。乜話？焗桑拿、洗腳都唔得？冇錯，因為呢類活動場所隨時涉及不道德交易，韋迪要官員廉潔清正，走出腐敗嘅中國足球風氣，所以連沐足都要禁。當然，官員亦唔可以接受他人財物，以及要盡量少出席地方協會同俱樂部嘅請食飯活動。不過江山易改，品性難易，中國官員咁多陋習，恐怕韋迪嘅政策都係徒勞無功。