英國嘅「大滿貫希望」梅禮，禮拜日喺澳網賽男單決賽以0:3輸咗俾瑞士「1哥」費達拿之後，冇即時飛返英國，反而繼續留喺墨爾本，仲喺禮拜一搵媽咪茱迪（圖）陪佢行街購物散心。不過，梅禮成程都嬲爆爆，面上一啲笑容都冇，而且仲不斷咁同阿媽講嘢，但佢阿媽冇因為咁而表現得唔耐煩。話時話，雖則梅禮佢仲未忘記到輸波嘅創痛，但係好識做人，喺贊助商間舖入面同fans影相同埋簽名時，就笑容滿面，而且表現得非常友善同親切。查實梅禮佢得嗰22歲，來日方長，大把機會贏大滿貫啦，千祈咪因一次衰咗就搞到自己謝晒呀。