埃及破紀錄連奪3屆非國盃冠軍，「埃及王子」美度喺另一邊廂都破紀錄，周一宣佈喺英冠嘅米杜士堡，外借至英超嘅「槌仔幫」韋斯咸，為期6個月，周薪只喺1,000鎊（約1.2萬港元），成為英超最低薪嘅國腳級球員。
「只想喺英證明自己」
我求大俠都有啲英國老友，問一問佢哋倫敦行情，原來一個掃街嘅清潔工人都有1,800至2,500鎊（約2.2萬至3萬港元）月薪；英國出名稅重指數高，美度屬於外勞，隨時抽一半稅，所以佢搵嘅錢，真係唔會多過「掃街」好多。
韋斯咸其實有新班主入主，財政叫做有啲改善，之前仲話出10萬鎊周薪利誘雲尼斯達萊加盟，但係雲佬就啋佢都儍，仲連隨飛咗去德國食漢堡；不過點解今次出手咁低呢？新班主蘇利雲就話：「唔好睇美度只係26歲，其實佢已經係有錢仔；佢唔需要更多錢，只要喺英格蘭證明自己，1,000鎊周薪都冇問題。」
「埃及王子」美度就話：「韋斯咸係一間偉大球會，我會為球隊作出貢獻。」話時話，以前香港公仔箱都有個膾炙人口嘅「掃街茂」，其實主人翁添哥家已經係金牌監製，一套「柴九哥」簡直威盡，「掃街」都有出頭天o架；美度之前踢羅馬、熱刺等大隊都應該搵落唔少，家踢波為興趣，就算人工奀過掃街，都冇問題啦！
韋斯咸埋門簽3前鋒
其實韋斯咸臨轉會市場關閉前，仲連續掃入3位前鋒；除咗美度之外，仲有由布力般流浪加盟嘅麥卡菲，同聖伊天加盟嘅伊蘭。南非國腳麥卡菲就冇美度咁大方嘞，收足3萬8千鎊（約47萬港元）周薪，仲簽約兩年半；連埋卡頓高爾、法蘭克洛保、迪亞文迪同法蘭高，突然間韋斯咸有成7個前鋒可用，領隊蘇拿真係護級心切喇。