爭奪小甜甜遺產嘅世紀爭產案噚日判決，呢單內情複雜、峯迴路轉嘅案件全城矚目，所以噚日一早已經有逾百記者喺高等法院外守候，估唔到件案仲成為國際新聞，風水富豪忽然升呢，都算另類香港之光。
法庭噚日朝早10點鐘左右發出判詞，不出半小時各大國際新聞通訊社已經報道龔家勝訴消息，幾乎同一時間，好多外國傳媒亦喺網站圖文並茂報道亞洲第一富婆遺產歸於華懋基金會，當中包括越南、印尼、荷蘭、西班牙，CNN土耳其網站亦有爭產案判決新聞。
隨時有機搭上外國富婆
香港回歸後難得一次成為國際傳媒焦點，一單超級八卦新聞，再次令香港受到外國媒體關注，除咗上述地方嘅新聞網站，連匈牙利、奧地利、羅馬尼亞、立陶宛以至意大利嘅傳媒網站都以唔小篇幅報道小甜甜遺產花落龔家。
八方唔曉咁多國語言，根據有限嘅繙譯知道呢啲報道多數以亞洲第一富婆形容小甜甜，哨牙通唔係被稱為風水富豪就係FengShuiMaster風水師，報道內容集中於噚日發出嘅法庭判詞，遺產案審訊時披露嘅情慾關係、種生基、挖窿等活動多數冇提及。
小甜甜生前與中方關係良好，北京關心案件係公開秘密，官方新華社噚日早上10點24分就以〈龔如心遺產案華懋慈善基金勝訴〉為題發出簡訊，下晝3點幾再出一段700幾字「詳訊」，以「亞洲女首富」稱呼小甜甜，指佢生活簡樸，每月花費不到3,000港元，又讚龔如心熱心公益，並提及哨牙通在庭上披露與小甜甜「有着長期的浪漫和性的關係」；新華網亦有相關報道。
哨牙通家陣國際知名，隨時有機會搭上外國富婆種生基，有人指已故立法局議員張鑑泉都請過哨牙通去立法局大樓（即現時立法會大樓）睇風水，據說哨牙通認為立法會五行欠金，而哨牙通最初與小甜甜睇風水時，因忍手唔收幾萬蚊「利是」而甚得小甜甜歡心，取信後仲成為入幕之賓㖭。
mailto:[email protected]