《城市論壇》好似BBQ，幾時都咁惹火，嘉賓火爆，維園阿伯扯火，連主持謝志峰都好有火，同維園阿伯開拖場面不罕見，謝志峰卻話其實好鍾意維園阿伯，甚至覺得佢哋好nice。
同成班阿伯飲茶
謝志峰日前接受一個網上電台訪問時話，「真心講一句，我真係好鍾意（維園）阿伯。」佢指維園阿伯身體力行支持香港言論自由，證明唔同意見嘅人都可以喺同一空間發表意見，而且維園阿伯講嘢冇私心，「只係愛國愛黨，別無其他（目的）。」
謝志峰更透露同過成班維園阿伯飲幾次茶，原來阿伯離開維園就唔同晒，「飲茶時好nice，只要尊重佢哋，大家就可以溝通。」外界成日懷疑維園阿伯背後有組織，隨時同西環有關，謝志峰笑言經多年觀察，至今未能解開呢個謎。港台近月請前紀律部隊人員到維園睇場，謝志峰稱只係想有效控制場面，總之過門都係客，只要阿伯冇動粗就唔會趕走佢哋，但若然傷害到人，就絕不手軟。