無綫同四大唱片公司因為歌曲版稅傾唔掂，搞到今時今日都仲未有解決方法，雙方仲要互相封殺，間接令到樂壇頒獎禮嘅四台聯頒傳媒大獎失去公信力，唔怪得明年四台聯頒嘅召集人港台，日前表示話考慮再提議四台合搞一個頒獎禮，唔使各自為政。
聯頒增公信力
噚日四大之一環球一哥張學友就去咗新城接受訪問，提到港台有意再提出呢個建議，早年已經提出過呢個建議嘅學友就話：「我都講咗十幾年，當年同今日嘅環境好唔同，家出碟搵食係冇可能，能夠成事梗係好啦，到時認受性同競爭性都大咗，大家興趣都會濃厚好多。」如果成事學友會唔會再參與呢？佢笑笑口話：「就算到時大會唔畀我玩，我都要去見證一下。」
學友再現亞視
不過喺旁邊嘅新城知訊台台長（音樂及娛樂）嘅朱明銳就大唱反調話：「港台唔好成日扮大佬，講埋挑釁性話題，咁搞對我哋商業機構好唔公平。總之搞一個頒獎禮係冇可能，新城係絕對唔會支持。」但係如果到時無綫同四大公司嘅版稅仲未傾掂，咁傳媒大獎又點算？朱明銳就話呢個真係要研究一下。至於學友係咪拍亞視音樂特輯？佢話會類似專訪嘅形式，嚟緊後日（5日）錄影，但未知會以點樣形式出街。
