大市經過6個交易日於20000水平以上輾轉反側，形成一個19800至21500嘅橫行平台，套用股評人慣常術語︰「一係爆上、一係爆落」。專業炒鬼都難以判斷，乾脆洗手不幹，先減磅過年，等個市有明顯方向再追都唔遲。
我都明白大家唔炒身痕嘅賭癮，短線策略唔好放過呢個咁靚嘅橫行波幅區。仲記得中石化（386）介乎6.20至7.20元嘅長方形嗎？由去年7月到今年1月中，半年時間唔使用腦低買高沽，足以賺晒成段波幅。撈底卻有淆底嘅時候，即使呢浪喺6.20元買入後，止蝕亦非常近，咁嘅走勢簡直係「封底必贏長方形」。
全球經濟正憂慮退市之際，連最掂嘅澳洲都突然唔加息，令市場O晒嘴，可見中央稍為收緊銀根已牽一髮動全身，有理由相信個市要悶埋過年先會出現較明顯方向。所以喺呢幾百點波幅入面，左手要有Call，右手要有Put，恒指牛熊證家喺市場上賣緊嘅都仲算係合理，起碼引伸波幅已回落到30左右，對指數敏感度高啲，即市夠位轉身。
轉炒電訊內容供應商
你可能會話，好多股份好似中國移動（941）、中國人壽（2628）及內銀股都有見底回升之勢，家唔撈底，第日買唔番！不如又開個周線圖睇睇，中移動仲係橫行，國壽、內銀都未脫險，先叫大家暫時唔好嫌賺得少，因為有糊唔食，罪大惡極。
講開中移動，睇CCTV見到王建宙喺瑞士參加達沃斯經濟論壇，佢同記者講參觀騰訊控股（700）單嘢，係傾合作唔係傾併購，仲有機會收購對方部份業務咁話。佢好興奮咁話好快嘅將來，用手機上網嘅用戶將超越電腦。唔好睇小呢個商機，冇10億都起碼有5億人用，相信今年炒電訊股策略又要變。設備股如中興通訊（763）同中國通信服務（552）等可能會行慢啲，取而代之係提供內容嘅公司，好似騰訊、A8電媒音樂（800）甚至係中國電信（728），皆因佢旗下就有強大嘅21CN。
胡孟青