怪事年年有，近排特別多。好似亞洲電視大股東權鬥咁，自從傳出內地新金主王征入主在即之後，台灣過江龍蔡衍明陣營突然靜晒，而地頭龍查懋聲呢邊呢，自從上月開過記者會後就繼續保持緘默，不過得意嘅係，查生失驚無神寄咗一封親筆簽名信，畀上月20號當日出席佢個記者會嘅記者。
查生喺信中話，好多謝大家一直關心佢喺亞視嘅投資，喺資訊發達嘅今日，大量資訊由報紙發送，傳媒對人嘅生活影響好大，所以更需要記者以多角度反映唔同觀點，報道畀讀者睇。
咁封信到底有乜含意呢？睇嚟查生好可能想提醒啲記者寫還寫，但唔好側埋一邊信晒佢對家。唔知係咪查生預計對家就快又出手，所以畀大家一個「溫馨提示」呢？