馬頭圍道塌樓慘劇發生後，屋宇署宣佈派40支由工程師或屋宇測量師率領嘅小隊巡查全港舊樓，工程界議員何鍾泰卻指驗樓唔係人人識睇，一定要結構工程師出馬先得，派測量師去巡樓，隨時睇漏眼。
俾人踩到上心口，測量師學會噚日發出聲明狂插何鍾泰無知，指建築測量師一向具備樓宇勘察同維修嘅專業知識，對何鍾泰言論深表遺憾。
測量師學會又指，結構工程師專長係設計同計算建築物結構負荷，而香港嘅舊樓維修問題，正係源於結構設計缺失，驗樓只睇結構唔夠全面，總之搵埋建築測量師睇最好。對於同屬專業嘅何鍾泰被插，代表建築、測量及都市規劃界嘅議員劉秀成真正手掌係肉，手背都係肉，所以至今冇出過聲。