股市唔會一味淨係向下插，當市況累跌到某個水平，出現超賣就會反彈，散戶順勢炒一轉，梗係好考反應與功力，事關反彈還反彈，都要留意實際彈力有幾強，以及彈上去有幾多水位可以走，假如市場氣氛仲係好差，咁就無謂抱太大期望，但若然感覺到大市最壞情況已過，稍為勇些少，嚴守止蝕入市都無妨。
大福證券（665）成功出售股權後，股價倍升，反映本地券商股委實有價有市。隨着內地資本市場逐步開放，相信容許大陸資金到海外市場投資必成趨勢，香港無疑係其中最大機會獲得眷顧的市場，所以擁有全牌照的本地券商將成為內地金融企業青睞對象。
英皇證券（717）現價市賬率低於1倍，無疑係併購熱門之一，該股去年曾以0.42元進行配股，但大股東大量認購，明顯肥水不流別人田。英皇證券昨升3%，收報0.51元。惟其每股資產淨值達0.59元，如果被內地企業睇中，市賬率炒高至1.5倍的話，回報已肥過肥仔水。
方星俠