左丁山勝在識得校友多，到西雅圖搵到教授Ｌ，佢又搵埋老總Ｓ，於是短短三小時內，左丁山對西雅圖之認識，來個大躍進。拜拜之後，與團友集合，去LakeUnion旁邊另一間海鮮餐廳Chandler'sCrabHouse吃午飯，既名蟹屋，自以鮮蟹著名，以DungenessCrab為主，頭盤又係生蠔，左丁山淺嚐即止，Ｐ先生就食到話唔夠喉，要叫多一打，律師Ｍ問佢：「平時食咁多蠔嘅咩？」Ｐ先生幽默感十足咁話：「太太如果有嚟，我食得仲多！」眾位男士轟然大笑，Ｑ大姐問：「你哋笑緊乜？」左丁山答：「笑啲蠔夠鮮甜呀！」
除咗生蠔與蟹，其他就一般咯，左丁山點咗GrilledTuna，魚肉得個「嚡」字，甚為失望，Ｐ先生話DungenessCrab係夠新鮮，但認真嚟講，同廣東人吃肉蟹冇得比，更加唔係大閘蟹嘅級數。中國人每年秋季吃大閘蟹，但英國報紙話泰晤士河有野生大閘蟹數以百萬計，破壞生態，英國急謀對策。如果泰晤士河水質尚可嘅話，不如將打撈大閘蟹之獨賣權，賣畀中國大陸，擔保以後中國人四季吃大閘蟹，泰晤士河生態可恢復舊觀。
飯後係自由活動時間，左丁山一個人去逛公司，因室外溫度大概係攝氏8度，穿上羽絨外褸啱啱好，但行入Nordstrom，室內氣溫有二十五度以上，立即滿頭大汗，於是除褸，左手拿雨遮，右手拿羽絨褸，呢度又冇奉送雨遮膠套，門口亦冇放雨遮設施，雨水隨遮身滑下，嘩，如果有位先生小姐在後面跣親，根據美國人好打官司習慣，可能畀人告到飛起？於是既狼狽又心驚，冇心機購物咯，行咗一層樓就鬆人，如果百貨公司設有衣帽間畀人放遮放衣物，生意或者會做多啲。不過教授Ｌ講過，落雨擔遮嘅一定唔係西雅圖居民，本地人見慣雨水，出門費事擔遮嘅！後來行入間B&N書店，見有本Zagat西雅圖飲食指南，揭開睇吓，內有評語，Canlis係西雅圖食肆之「黃金標準」，顧客入內要帶備白金信用卡；翠苑酒家物有所值；Chandler'sCrabHouse就平平無奇，還可一試咁話。