早前講過市況易跌難升，扑儍瓜炒即市似乎幾有效，指數單日波幅夠炒幾轉，但世事往往唔會咁筍，炒到咁上下，大戶就會識穿並設下狼來了嘅陷阱，淡友記得走位要快，過年前被挾親手指就無謂。
大市築底階段，個別板塊跌勢喘定，好似內銀同保險股，即使大市再穿底，招商銀行（3968）同發盈喜嘅中國太保（2601）反而有見底回升迹象，所以叫淡友睇淡之餘，亦唔好忘記個別股份撈底值博機會。仲有要留意埋先要試250日線嘅大價股如中石化（386）、中國鋁業（2600），喺250日線有機會反彈，但投資者唔好大貪，因為短線蟹貨實在太多。
內地率先公佈製造業採購經理指數（PMI），緊隨其後會有美國PMI。對上一次講PMI，係上一潮升浪開展之時，今次再講，因為Thedevilisinthedetails。
航運股有條件反彈
呢次內地PMI錄得55.8，表面睇繼續高於50，反映經濟繼續擴張，但擴張勢頭見頂，指數較上月回落0.8個百分點，係8個月嚟首次下跌，連新增定單都要跌1.1個百分點至59.9，令存貨數字升至47.3，即係話開始有貨賣唔去，生產商都唔急於落咁多單。
中外傳媒一面倒話指數回落反映經濟見頂，忘記咗高基數效應問題。睇晒各大行報告，都係美林最簡單直接，佢比較過05至07年嘅PMI，發現即使喺高增長時期，平均1、2月都只係得53.6，低於全年其他時間。即係話單睇1月份數字，根本未能反映中國獨特嘅季節性因素──傳統春節假期經濟活動暫時靜止，2月過後至回復正常。
正因為咁，分析呢個新PMI數字，應着眼於出口定單同生產成本。兩個數字都有升，反映出口需求仍然強勁，但生產成本亦與日俱增，將引發較大通脹。短期睇，中國經濟正經歷「冰火時期」，外圍着晒火，不斷增存貨；內部就要以冰水救通脹收緊銀根。既然外邊需求多，暫且唔好炒內需，睇睇航運股，跌定後應有較大條件反彈。
胡孟青