香港大學近年選親學生會都總係出事，好似最近嘅候選內閣尚風就不停攻擊現任幹事。佢哋噚日又再開記招，指去年幹事要罷免隱形左派會長陳一諤時，內務副會長成曉宜曾經搵過佢哋嘅人，要求造票將陳拉落馬，後來補選亦有幹事提出造票。
指控造票
造票指控好嚴重，不過尚風成員梅懌熙卻冇實質證據。被人狂砌，現任幹事會噚日亦舉行記招澄清，除咗新舊莊外，潛咗水一輪嘅陳一諤都有蒲頭，仲幾乎同成曉宜打起上嚟。八方問成曉宜做乜咁火滾，佢話陳一諤當時態度唔好，更挑釁佢，「你可以行埋來打我o架！」成曉宜話頓時火遮眼，不過最後都冇動手，陳一諤煽風點火後就潛水走人。
成曉宜稱尚風造票指控太過份，又話由於自己與陳一諤同一內閣，為免被人口實，因此去年避嫌冇投罷免票，現決定要搵法律界人士處理造票指控，唔能夠白白蒙寃。